今次個 post 比較長
因為想講返由開始 join 療程到而家發生既事
希望大家俾少少耐性睇落去
避免更多姊妹受害
/__\

我由細到大毛髮都好濃密
用過脫先膏 剃刀 脫毛機
但最後做到毛髮愈黎愈粗 又毛髮倒生
大個左儲到錢就想試下做 treatment

之前見團購有得百幾蚊試做脫毛 就膽粗粗買黎試下
間野係尖沙咀叫 windlxxd (費事開全名)
上到去未開始做 已經話就咁打 IPL (應該係彩光) 冇咩效果
唔加 gel 只可以遠距離咁打
每次做都要加二百蚊 先可以加 gel

之後又拉左我入房傾
係咁遊說我話而家有團購價永久打三個部位
下次黎就唔係呢個價

明明有少少理性都應該諗清楚先
起碼返屋企睇下效果係點再決定
但自己又衰在好想整走d毛毛
最後俾左九千幾蚊永久打全手全腳

好啦 俾完錢都已經冇得返轉頭
唯有祈求呢間野唔好咁快執笠 同埋有少少效果

直到而家 差唔多上左去做三四次
本來仲以為呢度都冇想像中咁差
點知今次上黎就出事喇 ..

今次上到去 有個比較大粒既人入左黎
問我覺得打左幾次感覺點
然後又話幫我做檢查
見到我小腿就話有毛髮倒生既問題
繼續打本身既彩光都冇咩用 係咁遊說我試打激光
我都推話唔洗啦 繼續做而家呢隻就 okay

然後就照常有治療師幫我做 treament
點知隻手未做完 忽然有人入黎 換走左本身個治療師

第二個入黎一開頭都係照常做 treatment
點知之後又係咁問我做咩唔加錢做激光
仲要冇咩禮貌 好似怪我唔識野咁
又話我毛囊炎 又有疤 好嚴重 又話要睇醫生
我聽到咁嚴重 就話咁唔轉激光 想睇左醫生先啦
點知佢又話打激光就可以解決個問題

我聽到都覺得擺明只係想我加錢轉激光姐
所以都堅持用返原本既彩光就得喇
點知果個人竟然話唔幫我打埋隻腳啦
因為而家毛囊炎 毛髮生係皮膚入面
打 黎 都 係 浪 費 時 間   (聽到呢度我真心燥左)

咁我問點解當初唔同我講彩光冇用
因為我一開始已經有少少毛髮倒生 毛囊炎既問題
佢就話因為要打幾次之後先知道有冇效果
咁即係之前俾既九千幾蚊都係試下得唔得啦
而家試左幾次就話唔 work 要俾錢再轉第二隻
咁即係之後佢都可以話呢隻唔得 又要再加錢轉其他啦

到最後我淨係做左對手 冇得做埋對腳
就帶住燥底既心情離開左

果刻真係好想爆果度既人
但又驚爆完之後 唔洗再上去做呢個唔知有冇效既療程
亦唔想之前俾左既九千幾蚊就咁凍過水

唯有睇下下次再做療程係咩情況
如果佢都係繼續拒絕幫我 treatment
都唔知可以點算 唯有當買左個教訓
T___T