《上環花店 ( Tiffany flower  姚欣店)令我婚後一星期依然每晚發惡夢》
 
自己兩公婆都係做服務行業,幾經努力儲夠錢結婚,深明比西客投訴真係好煩好討厭,冇諗過喺自己婚禮會搞到要打千字投訴文。
 
由今年7月尾第一次步入呢間鋪頭,估唔到就係惡夢既開始,同當時負責人tiffany 傾,原先表示想要一個真花球、兄弟姐妹襟花,同新娘頭花,想了解大約咩價錢,tiffany答我佢地冇特定嘅價,係由我自己去開價決定要啲咩貨,當時我諗佢係主張豐儉由人,咁我就話HKD 2千幾3千左右得唔得啦(因為人生唯一一次結婚唔會知市價其實係點),佢話ok~
 
然後TIFFANY 再問我其他家人襟花車花等需唔需要,我就話要,經商量後,決定要:
 
-真花球一個 (我表示想要一個圓身的,同埋因為我本人較矮,唔襯韓式款,阿TIFFANY 仲話出面埋曬啲花球成9寸10寸好核突)
– 新郎襟花x1
– 新娘頭花(1褂1婚紗)
– 雙方父母襟花 = 4
-兄弟姐妹 共9個襟花/手花
-車前花x1 車門花x4 (半真假花)
 
最後我話,我加左幾個items,係咪應該要加番啲錢,佢話就3688啦,咁我就話ok,仲立即比錢! 佢話會盡快出張單比我,會列清楚我要嘅items,於是我就走左,點知原來已經係惡夢嘅開始。
(當日係今年7月22日)
 
到左8月頭,我發現仲未有單,就喺8月12號去左佢鋪頭,問佢地係咪漏左,佢話立即出番比我,同日下午我先經wtsapp收到張單,但單上並不是tiffany所講,會列出所有items。
 
然後8月31日,我wtsapp問可唔可以交對結婚公仔比佢地處理做車頭公仔,佢地話ok,同日,發現invoice 落錯送貨日期,我打去通知佢地,先即日再修正再send番比我。
 
到9月頭左右,我再去佢地鋪,問佢地需要幾時比對公仔佢地,佢話婚期前幾日就得,好簡單。於是我喺9月30號將對公仔交去佢地上環鋪頭,然後同日再以wtsapp 補講一次我已經交左對公仔比佢地。
 
到左10月初,見婚期在即,於是我打去打算核對一次,核對後發現落少左兄弟一個襟花,再作出修改。
 
到10月11日,化妝師好好人,提醒我要同花店講,頭花需要用細朵的花。我立即通知花店,佢地亦回覆我ok。
 
婚前幾日,花店員工打黎,問我大約幾點有人收貨,就佢地收工唔會太夜,於是我約左佢地4-5點左右。
 
到左婚前一日,戲肉來了!下午3點幾,我打去花店double confirm係咪4-5點送貨,一打去tiffany聽,佢已經開始起槓,話我第二日先係big day,咁心急做咩~話佢剛剛先整好啲花,我表示只係需要得個知字,confirm冇問題就ok。
 
到4點左右,佢wtsapp左啲手花同幾張我唔知係屬於咩item嘅相比我(後來話係車頭花),我睇相就表示覺得好靚(而家後悔到一個點)。6點幾佢問我係咪已經對好,對好司機就開車送貨,由於我根本唔知幾張相入面邊啲係屬於邊一個item,根本對唔到,就打比佢,但佢冇聽。 回想番3點幾打比佢時,佢態度都十分胸有成竹,亦都盡力提醒自己,不要做西客,於是我冇再打去追,只係自己再cap番7月時佢wtsapp到講左會包嘅items比佢睇,一直再靜靜等佢回覆。
 
到左夜晚8點40分,再問佢司機大約幾點出發,我亦都唔夠膽比說話佢聽,始終萬一啲花出事,受害的只係我地自己。
 
到左夜晚9點,我地終於收到佢老公電話,話喺上環出發送貨。9點24分,佢先通知我漏左頭花,我已經嚇到癲左,我收到貨後再對一次,發現今次大獲了:
 
1 花球佢整左當初話好核突嘅韓式扇形款
2 新娘頭花冇
3 新郎襟花冇
 
佢話佢電腦系統壞左,所以當日啲單錯曬,唔好意思,佢第二朝9點開門,但我地嘅接新娘時間係9點,冇可能等第二朝。立即打比佢溝通後,我搵到朋友肯幫我立即飛的去上環將花球退番比佢話佢電腦系統壞左,所以當日啲單錯曬,唔好意思,佢第二朝9點開門,但我地嘅接新娘時間係9點,冇可能等第二朝。立即打比佢溝通後,我搵到朋友肯幫我立即飛的去上環將花球退番比佢改番圓型,再拎番漏左嘅襟花同頭花,最後頭花係正常花束size,並唔係佢應承我嘅細size,最後亦用唔到佢嘅頭花。
 
朋友問佢點解啲花咁殘,佢話而家興。(甘不如你比棵草我話而家興啦!)
 
最後根本冇得揀,我亦只想解決件事就算,當時已經夜晚10點幾,唯有照要左先,真係好好彩有朋友肯幫手去鋪頭處理。
 
到半夜12點,我正打算訓,先記起嗰一對佢話好快搞掂嘅花車公仔,都漏左冇送黎。我又再立即打比tiffany 小姐,佢話佢啲員工已經訓曬,冇可能再送貨,問番我轉頭,有冇可能再搵人去佢鋪頭拎,我話我嘅兄弟姐妹全部聽日一早起身,都訓曬! 於是安排左第二朝9點,佢鋪頭開門再搵員工送貨比我。
 
一世人一次的大事隨時就因為D無良商店搞到肉肉酸酸。當時唯有安慰自己冇事嘅冇事嘅,再去番訓,然後訓到半夜,我已經嚇到醒左,,,最後食粒安眠葯先訓到。
 
第二朝兄弟姐妹們已經立即拿拿聲打去追花店送番對公仔比我地,最後係9點幾大約十點送到,亦辛苦所有兄弟立即幫手佈置花車。
 
Big Day當晚,tiffany 仲可以wtsapp問我有冇靚相同佢share,我唯有已讀不回。
 
然後打後一星期,我每晚都發惡夢諗番當晚嘅事嚇醒。
 
我老公見我咁樣,今日打電話搵負責人對質,然後tiffany聽左電話。我老公追問佢關於當日嘅錯漏有咩答覆,佢又答番係電腦system壞左,話我當日都好滿意仲有比like佢地,老公話佢當時態度十分囂張,根本唔覺得自己有錯(因為第一次喺鋪頭傾,佢有WhatsApp 打底會做邊幾個items,其實可以check番),不停話當日已盡力幫我地解決問題,而且第二朝送貨冇收番錢,老公問佢,如果唔係送漏貨又點使第二朝補送,佢只答係觀點角度問題,依然唔肯認錯,再用惡劣態度問老公我地想點。老公表示冇需要佢金錢上任何賠償,希望佢地喺fb或其他平台講番件事道歉,tiffany 表示要交由公司律師團隊意見,老公問佢係咪認為搵律師就好叻,表示我地亦有律師朋友可以幫忙。
 
 
老公傾完後講番我知,我立即wtsapp通知番佢,我嘅like係開初佢只send左幾張相比我,而目亦未發現錯漏百出嘅時候講,如果有需要,我可以喺佢地fb/ig講番,佢地當時已讀不回。
 
直到夜晚,再收到一位表示係tiffany flowers嘅負責人張生通知佢地已經收到投訴,將事件交比律師處理,得知我地亦已搵律師代表,希望日後通過律師溝通。
 
於是我打番去問佢知唔知到底件事來龍去脈係點,我地冇話過“已搵“律師,我老公係話有需要我地都可以搵。負責人張生表示:“有乜好同你傾,我冇興趣聽你講嘢wo,有乜事搵律師囉~“ ,咁我當然表示ok。
 
即係我去買LV,佢比h&m我,我投訴貨不對辦重要比人兇反轉頭話揾律師告我?一直係花店錯漏百出,老公只要求佢地公開講番件事並道歉,點解態度可以咁樣?
 
當日只係打算一切息事寧人,唔好影響出嫁心情,就當解決事情就算,冇諗過陰影可以嚇到我發足一星期惡夢。打呢篇千字文,唔係求D乜,只係希望各位準新人,揀花店時更加小心,唔好搞到好似我咁,一世人得一次架咋!。多謝呢到比位我呻。。。。。。