我們要求一架粉紅色嘅勞斯萊斯嚟做花車,當時租車老闆話冇問題。我仲要俾埋幅相話要指定呢部。老闆話呢部冇人租,話可以俾我哋租。一星期後,我同未婚妻一齊去確定行程時。佢都話係粉紅色勞斯萊斯,仲叫我哋俾哂錢,咁結婚當日唔駛找尾數就司機可以夠鐘就走。

結婚前兩日,司機打電話俾我確實時間地點後就問我係唔係當日找埋條尾數,我就話俾個司機聽條數一早就俾哂「全為您」湯生。跟住佢就cut綫。

結婚前一晚,湯生打嚟問我有冇滙豐戶口,佢一個鐘後會匯$2500去俾我叫我俾司機。心諗:「點解你唔直接俾司機咪得囉,做乜要匯俾我,跟住我要特登去搵機㩒錢出嚟!」

結婚當日一早我去銀行見到冇$2500,就打俾湯生問清楚,佢個電話就一直打唔通。到架車嚟咗嘅時候,一睇,點解會係粉紫色嘅倫敦的士?打俾湯生又搵佢唔倒。打咗十幾次後終於聽電話喇,跟住同我講話粉紅色嗰架噠唔著,叫我用呢架算。落訂單嘅時候指明要粉紅色嘅時候,嗰架唔得嘅話,你都俾另一架粉紅色嘅車我吖,唔係一架粉紫色嘅倫敦的士囉。跟住嗰$2500話尋晚唔記得過數,15分鐘後會匯俾我。半個鐘後去check,都係未過數,再打俾佢就成日唔開電話啦。跟住個司機叫我俾住錢佢先,等佢可以走。我又唔想結婚當日俾呢件事擔誤時間,就俾咗佢先。

婚後一日,我去商鋪理論時,啲職員話湯生唔喺度,叫我第二日再嚟過。

至今仲未收返條數!仲要一肚氣~